Kiyevdə gecə hücumundan sonra yanğınlar və su kəsintiləri

Rusiyanın Kiyevə sentyabrın 30-na keçən gecə hücumu nəticəsində iki nəfər həlak olub, daha dörd nəfər xəsarət alıb. Bu barədə Kiyev Şəhər Hərbi Administrasiyası məlumat yayıb. Həlak olanlar arasında bir qadın var.

Paytaxtın Svyatoşin, Podil, Holosiyiv və Solomyanka rayonlarında yanğınlar və dağıntılar baş verib. Svyatoşin rayonunda 10-a yaxın fərdi ev zədələnib, onlardan biri yanıb.

Podil rayonunda düşmən qeyri-yaşayış binasına zərbə endirib və nəticədə 6-cı mərtəbədə dam örtüyü və tikinti materialları yanıb. Həmçinin anbar binasında və iki mərtəbəli fərdi evdə yanğın və dağıntı qeydə alınıb.

Holosiyiv rayonunda hamam, tikinti vaqonçası və betonqarışdıran avadanlıq yanıb, yanğın söndürülüb. Solomyanka rayonunda açıq ərazidə ot örtüyü yanıb. Şəhərdə elektrik və su təchizatında fasilələr müşahidə olunur.