Rusiya Ukraynaya PUA ilə hücum etdi: Kiyev və Xarkovda yaralılar var

Sentyabrın 28-nə keçən gecə Rusiya qoşunları Ukraynaya 165 pilotsuz uçuş aparatı ilə hücum edib. Hava hücumundan müdafiə qüvvələri onlardan 112-ni zərərsizləşdirə bilib. Ölkənin müxtəlif regionlarında 14 lokasiyada zərbə qeydə alınıb.

Xarkovda Saltivski rayonunda çoxmənzilli binaya endirilən zərbə nəticəsində yaralıların sayı 35 nəfərə çatıb, onlardan onu uşaqdır. Yaralanan ən kiçik uşağın üç yaşı var. Yerli hakimiyyətin məlumatına görə, Xarkov vilayətində iki nəfər həlak olub: Şestakove kəndində kişi və Veliki Burlukda qadın.

Kiyevdə gecə hücumu nəticəsində dörd nəfər yaralanıb. Şəhərin dörd rayonunda ziyan qeydə alınıb. Səhər ruslar paytaxta yenidən hücum edərək Obolon və Holosiyiv rayonlarında iki yanacaqdoldurma məntəqəsinə, Şevçenko rayonunda isə ofis binasına zərbə endiriblər.

Çerniqov vilayətində, Novqorod-Siverski şəhərində sentyabrın 27-si axşam PUA yaşayış massivinə hücum edib. Orada dörd nəfər, o cümlədən iki uşaq yaralanıb. Ümumilikdə yaşayış binalarına zərbələr Sumı, Rivne və Odessa vilayətlərində də qeydə alınıb.