Rossiya Kiyevdagi «Darnitsa» farmzavodiga uchinchi marta zarba berdi

Dushanba, 28-sentabr kuni rus qoʻshinlari Kiyevdagi Antonovich koʻchasida joylashgan «Dobrobut» tarmogʻining tibbiy markaziga zarba berdi. Muassasa xabariga koʻra, hujum natijasida yetti kishi jabrlangan, ulardan oltitasi — markaz xodimlari. Barcha jabrlanuvchilarga tibbiy yordam koʻrsatilgan, bir necha kishi qabul boʻlimlariga yetkazilgan.

FVV maʼlumotiga koʻra, Golosiyiv tumanida tibbiy markazga berilgan zarba tufayli uch kishi jabrlangan. Hodisa joyida yon atrofdagi 4 qavatli turar-joy binosining tomi yonib ketgan — qutqaruvchilar bir ayolni qutqarib, yongʻinni bartaraf etgan. Tibbiy muassasa binosining yuqori qavatlari shikastlangan, birinchi uchinchi qavatlargacha oynalar singan, tibbiy asbob-uskunalar zarar koʻrgan.

Bundan tashqari, rus qoʻshinlari Kiyevdagi «Darnitsa» farmatsevtika kompaniyasi zavodiga uchinchi marta zarba berdi. Kompaniya matbuot xizmati hujum natijasida halok boʻlganlar va jabrlanganlar yoʻqligini maʼlum qildi. Vayronagarchiliklar koʻlami haqidagi tafsilotlar oshkor etilmayapti.

Poytaxtning Shevchenko tumanida toʻrtinchi qavat darajasida 7 qavatli maʼmuriy binoga zarba berilgani haqida shahar hokimi Vitaliy Klichko xabar berdi. Oʻt oʻchiruvchilar Ukraina Milliy Fanlar Akademiyasi binosidagi yongʻinni lokalizatsiya qilgan. Solomyan tumanida esa uchuvchisiz apparat xususiy turar-joy binolari orasidagi ochiq maydonga qulagan.